Calendario interactivo para vivir a Coresma en familia

En breve comezará a Coresma e desde as delegacións de Catequeses e Laicos, Familia e Vida queren convidar as familias a «vivir de maneira especial este tempo litúrxico». Para iso decidiron unirse e ofrecernos unha ferramenta sinxela que poida axudarnos a vivir este tempo con máis intensidade dunha forma familiar. Trátase dun PDF interactivo que pode descargarse a través de calquera dispositivo móbil.

“Camiño á Pascua, Camiño á vida” é un documento interactivo con ligazóns a actividades, vídeos e cancións que «poden axudar aos membros das familias para achegarse a Xesús e a percorrer este camiño coresmal. Desta maneira facemos que as nosas familias vivan tamén a fe unidas, máis aló da celebración dominical», apunta Mar Sarmentero, delegada de Laicos, Familia e Vida.

Este documento está dispoñible para descargar na páxina web www.mondonedoferrol.org e nas seccións de cada unha das delegacións. Anunciarase tamén a través das redes sociais e cada venres a través da canle diocesana de noticias de WhatsApp, para poder acceder coa suficiente antelación aos materiais dos cinco domingos da Coresma.

Para facer máis efectiva a difusión deste material, desde as delegacións solicitan a colaboración das parroquias e UPA, a través dos seus sacerdotes e catequistas, para que «o divulguen aos pais e nais dos menores que se están preparando para recibir os sacramentos de iniciación cristiá. Así poderemos chegar xuntos a descubrir que “Xesús morre e resucita por ti, porque che quere e quere que sexas feliz”. Non nos cansemos de sementar e promover ocasións», animan nunha carta remitida a todas as parroquias da diocese.

DESCARGA: CALENDARIO DE CUARESMA