Cáritas recibiu máis de 24 millóns de euros en 2022 a través do ‘X solidario’ da Declaración da Renda

Desde a rede confederal de Cáritas lembran que marcar conxuntamente o ‘X’ da Igrexa e a de Fins Sociais non supón pagar máis nin que lle devolvan menos.

A rede confederal de Cáritas recibiu en 2022 máis de 24,4 millóns de euros do ‘X solidario’ da Declaración da Renda, uns fondos que foron destinados a distintos programas relacionados co acompañamento de persoas e familias en situación de vulnerabilidade.

“A solidariedade dos contribuíntes españois a través dos recadros da asignación tributaria permite a Cáritas poñer en marcha cada ano centos de proxectos sociais, xa que, como entidade do terceiro sector de acción social, obtén fondos a través da casa de ‘outros fins sociais’ e tamén do recadro destinado á Igrexa católica, ao ser a confederación oficial das entidades de acción caritativa e social da Igrexa en España”, explicou Eduardo López, do equipo de Sensibilización e Comunicación en Cáritas Española.

Así, Cáritas sinalou que o contribuínte pode “multiplicar a súa solidariedade ao achegar o 1,4% dos seus impostos tanto ao sostemento da Igrexa como aos fins sociais”. “Este sinxelo xesto non supón pagar máis nin que se lle vaia a devolver menos no resultado da súa declaración”, indicou.

O ano pasado, o 53% das persoas contribuíntes marcaron o recadro solidario da renda, superando os 11,7 millóns de persoas. Aínda que, hai un 47% que non o fan, ou ben porque marca soamente o recadro da Igrexa católica ou porque non marca ningún dos dous.

Durante a presentación da campaña da X Solidaria, a Plataforma de ONG de Acción Social (POAS) lembrou que, se todos os contribuíntes marcasen o recadro doutros fins sociais, as organizacións do terceiro sector poderían recibir este ano preto de 704 millóns de euros en lugar dos 425 que obtiveron da asignación tributaria, segundo o balance dos datos provisionais facilitados por Facenda.

Por iso, con motivo do inicio da campaña da Renda 2023, Cáritas lanzou a iniciativa ‘Non custa nada axudar X dous‘ para convidar á sociedade para marcar as dúas casas.

En Mondoñedo-Ferrol, con motivo do inicio da Campaña da Renda 2023, a diocese e Cáritas únense para lanzar conxuntamente a campaña “Non custa nada axudar por dous”, onde se convida á cidadanía para marcar o dobre “X” na súa declaración. As dúas entidades informaron a través dunha rolda de prensa sobre a relevancia da asignación tributaria para o desenvolvemento das súas actividades.