Completada a "Galería dos Bispos" na catedral de Mondoñedo

O martes 18 de xullo tivo unha das súas reunións habituais o cabido da catedral de Mondoñedo. A reunión celebrouse na sala de conferencias habilitada na Casa dos Cóengos, un espazo que reúne as condicións necesarias para este tipo de encontros, máis adecuado que a tradicional sala capitular.

Neste espazo colocáronse oito cadros que recollen os retratos dos últimos bispos da sé mindoniense, desde Benjamín de Arriba e Castro (1935-1944) ata Luis Ángel de las Heras Berzal (2016-2020), pasando por Fernando Quiroga Palacios (1946-1949), Mariano Vega Mestre (1950-1957), Jacinto Argaya Goicoechea (1957-1968), Miguel Anxo Araújo Iglesias (1970-1985), José Gea Escolano (1987-2005) e Manuel Sánchez Monge (2005-2015). Desta maneira complétase a serie de retratos que se conservaba na catedral, recuperando un elemento importante do que significa a memoria da Igrexa diocesana do século pasado.

A catedral, sé do bispo, sendo templo nai de todas as igrexas da diocese, alberga a cátedra desde a que o bispo ensina, santifica e rexe ao pobo de Deus. Por iso, na celebración do comezo do ministerio episcopal, o acto central constitúeo a toma de posesión da cátedra, na que o novo bispo senta na sé episcopal.

Ademais, os bispos, como sucesores dos apóstolos, gardan esa sucesión que lles vincula multisecularmente uns a outros na historia. Por iso é polo que todas as catedrais gardan unha galería dos seus bispos na que expoñen os retratos dos que ostentaron a cátedra, expresando así a importancia desa sucesión.

Tamén a catedral de Mondoñedo conserva algúns deses retratos, dispostos na sala capitular. Con todo, esta memoria perdeuse desde mediados do século pasado, polo que o cabido quixo emendar este defecto recuperando algúns dos retratos dos bispos diocesanos. Para iso utilizáronse cadros e fotografías xa existentes, que foron preparados adecuadamente e dado uniformidade.