Decreto de aprobación dos estatutos do cabido catedralicio

O cabido catedralicio de cóengos é un colexio de sacerdotes, ao que corresponde celebrar as funcións litúrxicas máis solemnes na igrexa catedral (…) e cumprir aqueles oficios que o dereito ou o Bispo diocesano lle encomende. (CIC c. 503).

Todo cabido, tanto o catedralicio como o dunha colexiata, debe ter os seus propios estatutos, elaborados mediante lexítimo acto capitular e aprobados polo Bispo diocesano; estes estatutos non poden modificarse nin abrogarse sen a aprobación do Bispo diocesano (CIC c. 505).

Os estatutos do cabido, quedando sempre a salvo as leis fundacionais, determinarán a constitución do mesmo e o número de cóengos; establecerán que ha de facer o cabido e cada un dos cóengos respecto ao culto divino e ao cumprimento do ministerio; regulamentarán as reunións nas que se trate dos asuntos do cabido, e, respectando sempre as prescricións do dereito universal, establecerán as condicións que se requiren para a validez e licitude dos actos (CIC c. 506&1)

Por iso, dado que estes estatutos foron elaborados en lexítimo acto capitular celebrado o pasado día catorce de agosto, polas presentes APRÓBOOS, entrando en vigor o día primeiro de outubro de 2023.

Dado en Mondoñedo, ao 1 de setembro de 2023.

+ Fernando García Cadiñanos
Bispo de Mondoñedo-Ferrol

Por mandato da S. Excia. Rvdma.
Félix Villares Mouteira
Chanceler Secretario Xeral

Descarga: Decreto de aprobación de los estatutos del cabildo de la catedral de Mondoñedo