“Eu non te esquecerei”: Mondoñedo pon no centro ás persoas maiores na II Xornada Diocesana dos Avós

• Tras a celebración da Xornada Mundial dos Avós en Ferrol, a cita diocesana trasládase este venres 4 de setembro á catedral e ao seminario de Mondoñedo

A Diocese de Mondoñedo-Ferrol celebra este venres, 4 de setembro, a II Xornada dos Maiores e Avós, unha iniciativa que, por segundo ano consecutivo, se consolida como un espazo de celebración, encontro e acción de grazas para as persoas maiores da diocese. A xornada está organizada pola Delegación de Pastoral da Saúde e Maiores, en colaboración coas Residencias de Maiores da Fundación San Rosendo, o Centro Residencial e Centro de Día San Rafael de Mondoñedo e a Asociación Edad Dorada-Mensajeros de la Paz.

Esta cita dá continuidade á celebración da Xornada Mundial dos Avós e das Persoas Maiores, que tivo lugar o pasado mes de xullo en Ferrol no marco do calendario universal da Igrexa. Alí, a comunidade diocesana reuniuse para poñer no centro a dignidade, a memoria e o acompañamento das persoas maiores, en sintonía coa mensaxe do papa León XIV para 2026 e baixo o lema “Lo que nos hace humanos es cuidar”.

A xornada desenvolverase en Mondoñedo con estes horarios:

· 12:00 h. Acollida e preparación da eucaristía na catedral de Mondoñedo.

· 12:30 h. Celebración da eucaristía, presidida polo bispo diocesano, monseñor Fernando García Cadiñanos, e coa participación dos representantes das entidades colaboradoras.

· 14:00 h. Xantar no Seminario Santa Catalina, como espazo de confraternidade entre os residentes, usuarios dos centros de día, voluntarios, familiares e axentes pastorais.