Historias de vida: Los seminaristas de Mondoñedo-Ferrol - Diócesis de Mondoñedo

A Igrexa celebra o vindeiro domingo 19 de marzo, solemnidade de San Xosé, o Día do Seminario, este ano co lema «Érguete e ponte en camiño», unha oportunidade para para “pedir, dar grazas e mostrar a nosa proximidade cos seminaristas, os seus formadores e as vocacións sacerdotais”.

Deus segue chamando, e os nosos seminarios están cheos de historias de vida onde é fácil recoñecer a pegada de Deus, a súa voz ecoa: «Érguete e ponte en camiño».

É por iso que, con motivo desta xornada, os catro seminaristas da nosa diocese (Salvador Calvo, Renny Montero, Darío Trujillo e Andrés Segura) quixeron compartir con toda a comunidade de Mondoñedo-Ferrol o que supuxo e supón a chamada de Xesús nas súas vidas, unha chamada para vivir sempre co corazón alerta, próximo ao sufrimento dos irmáns e disposto a entregarse enteiramente aos demais.

Coordinados polo reitor do Seminario, Juan Basoa, e coa colaboración do delegado diocesano de Vocacións, Jaime Iglesias, e a comunidade relixiosa das Discípulas de Jesús, viñeron preparando unha serie de contidos especiais para conmemorar o Día do Seminario 2023. Estes consisten nun vídeo-mensaxe; o comentario e reflexións ao evanxeo do día; e unha selección de oracións pola vocacións sacerdotais. Os documentos xa poden descargarse a través desta páxina e os vídeos iranse compartindo tanto na canle de Youtube como nas redes sociais durante os días 13 e 19 de marzo.