Roteiro e fotografías para a conversión ecolóxica: propostas diocesanas para o Tempo da Creación

A vigairía para a Caridade da nosa diocese fainos chegar diversos materiais para a celebración do Tempo da Creación, do 1 de setembro ao 4 de outubro. Trátase dun tempo que comeza o Día Mundial de Oración polo Coidado da Creación e péchase o día de San Francisco de Asís, patrón da ecoloxía. Durante este período, os cristiáns renovamos en todo o mundo a nosa fe no Deus creador, uníndonos dun xeito especial na oración e a tarefa a favor da defensa da casa común.

Xunto coa mensaxe que o bispo diocesano escribiu para a ocasión, publicada onte, sumamos diferentes propostas para que nas UPA e parroquias da diocese se poidan organizar encontros ou eventos. Son as seguintes:

Roteiro, coloquio e cea en Vilarrube

A primeira das propostas responde a un roteiro guiado “para a conversión ecolóxica”, dun pouquiño más de cinco quilómetros de distancia entre o encoro das Forcadas e a igrexa parroquial de San Martiño de Vilarrube (Valdoviño). Desenvolverase o venres 13 de setembro, con saída desde o Centro Cívico de Canido (Ferrol) ás 17:00 horas, onde se compartirán vehículos para o traslado ao punto de comezo da andaina. Na chegada farase un coloquio e compartirase unha pequena merenda-cea (cada un dos participantes levará a súa). A organización recomenda a utilización de ropa cómoda e adaptada ás condicións metorolóxicas do día, así como chalecos reflectores para garantir a seguridade persoal. A finalidade desta actividade é favorecer a reflexión sobre a situación do planeta e o noso compromiso persoal na construcción dun mundo mellor.

Proposta fotográfica

“O mundo canta un amor infinito, como non coidalo?” (Número 65, Laudato Deum, Papa Francisco, abril (2023).

A segunda proposta é unha invitación a compartir unha foto de calquera punto da diocese de Mondoñedo-Ferrol que suxira dar grazas a Deus pola creación e o seu coidado, á que se lle poñería como título a expresión do papa Francisco recollida no parágrafo anterior.

Pautas para participar:

· Todas as fotografías serán en formato dixital (JPG ou TIFF) coa maior calidade posible e enviaranse ao email: mgonzalez@caritasferrol.es

· Co envío da fotografía indicarase: co maior detalle posible, o lugar onde foi tomada, así como os datos do autor (nome e apelidos, DNI, dirección postal completa, código postal, email e teléfono de contacto; e no caso dos menores, adxuntarase o permiso do titor).

· Non se aceptarán copias de fotografías publicadas, só se recollerán fotografías orixinais.

· O envío da fotografía conleva a cesión á diocese de Mondoñedo-Ferrol dos dereitos de reprodución, distribución, comunicación pública e transformación sobre as obras fotográficas, que poderán aparecer na web e as redes sociais.

· As fotografías nas que aparezan persoas recoñecibles deberán ir acompañadas, se se precisa, dunha autorización sobre o uso da súa imaxe.

Recursos/materiais especiais para vivir o Tempo da Creación