A diocese presenta a "Guía de boas prácticas para a protección de menores"

A Comisión PROTEXE, órgano da diocese de Mondoñedo-Ferrol responsable da protección e acompañamento a menores e persoas vulnerables, editou unha sinxela guía de boas prácticas para a protección de menores. Trátase dun material, en galego e castelán, destinado a todos os axentes de pastoral da diocese, así como aos pais e titores de menores, no que se explica, de maneira áxil e gráfica, o Protocolo de prevención e actuación fronte a abusos sexuais vixente na diocese. Como se lembrará, devandito protocolo, de carácter máis xurídico e amplo, foi aprobado polo bispo Fernando García Cadiñanos hai exactamente un ano.

Agora, con este material, preténdese completar o protocolo e ofrecer unha guía básica e completa, de fácil acceso e amplamente difundida, co obxectivo de seguir creando nas parroquias espazos protexidos para a infancia. Como se indica na introdución á guía, “o obxectivo final é crear un sistema de protección integral ás persoas, fomentando a cultura dos bos tratos nas institucións relixiosas diocesanas e creando contornas seguras para as relacións humanas”.

Con este novo paso, a diocese de Mondoñedo-Ferrol avanza no seu compromiso polo coidado das persoas, especialmente dos menores e persoas vulnerables, buscando erradicar o mal dos abusos do seo da Igrexa e da sociedade. Nos vindeiros días comezará a difundirse amplamente nas parroquias e demais institucións relixiosas da diocese. Para o próximo curso programaranse varios encontros informativos con diferentes axentes que a dean a coñecer e avancen na formación e prevención ante os abusos.

A Comisión PROTEXE está formada por cinco persoas especialistas en diferentes campos do saber: xurídico, psicolóxico, comunicativo, espiritual. Ten como misión acoller calquera denuncia que se poida dar por abusos a menores, así como acompañar e asesorar cando se produzan estes casos. A súa misión tamén na de iniciar procesos formativos no seo da Igrexa que axuden a detectar situacións de abuso e, sobre todo, previr. Para iso, está a participar en diferentes encontros que se teñen a nivel nacional e, de cara ao próximo curso, están a preparar algunha sesión específica que siga expresando o compromiso eclesial neste campo.

Descarga: Guía diocesana de boas prácticas para a protección de menores (Español)
Descarga: Guía diocesana de boas prácticas para a protección de menores (Galego)

Máis información: protege@mondonedoferrol.org