A Xunta inviste 360.000 euros na rehabilitación da igrexa de San Salvador de Lourenzá

O conselleiro de Cultura, Educación, FP e Universidades, Román Rodríguez, e o bispo da diocese de Mondoñedo-Ferrol, Fernando García, visitaron o resultado das obras de rehabilitación da igrexa do mosteiro de San Salvador de Lourenzá. Unha intervención na que departamento de Cultura da Xunta investiu máis de 360.000 euros e grazas á que se solucionaron os problemas de conservación do templo.

Román Rodríguez destacou o compromiso do Goberno galego coa recuperación do patrimonio artístico e cultural, que se traduce nun aumento do 14% nos orzamentos de 2023 para este fin.

“O noso obxectivo é conservar bens tan singulares como este para que poidan gozar deles non só a presente xeración, senón tamén as próximas”, afirmou. O conselleiro lembrou, ademais, que o mosteiro de San Salvador de Lourenzá é un valioso elemento no Camiño do Norte, polo que constitúe un importante atractivo dinamizador para os visitantes que chegan á zona.

As actuacións de restauración tiveron como obxecto o cambio e arranxo das partes da cuberta do templo danadas, así como da lanterna situada sobre a cúpula do cruceiro. Así mesmo, reparáronse as humidades que presentaban tanto as revocaduras das bóvedas como as naves laterais e as partes baixas dos muros do triforio. Ademais renovouse por completo a instalación eléctrica da igrexa e cambiáronse parte das luminarias.

Exemplo da arquitectura de Casas e Novoa

Considerado Monumento Histórico Artístico Nacional desde o ano 1974, o mosteiro de San Salvador de Lourenzá foi fundado polo conde Osorio Gutiérrez (coñecido como o Conde Santo) a finais do século I. Chegou ao seu maior apoxeo nos séculos XVII e XVIII, cando se substituíu completamente o primitivo mosteiro medieval, do que quedan apenas restos como unha lauda ou lápida sepulcral do século XII e unha ara, posiblemente do X.

O templo actual, construído en granito procedente de Burela, iniciouse en 1735 con trazas de frei Juan Vázquez de Samos, modificadas por Fernando de Casas e Novoa, autor da monumental fachada do Obradoiro na catedral de Santiago de Compostela.

A fachada da igrexa responde plenamente os ideais da arquitectura de Casas e pode considerarse como precedente inmediato da do Obradoiro, cun corpo central flanqueado por dúas torres, das que só a do reloxo foi concluída.

A igrexa ten planta de cruz latina, cunha nave maior dividida en catro tramos e composta dunha nave central máis ancha e dous laterais separadas por grandes piares. A nave central cóbrese cunha bóveda de canón de catro tramos cun gran luneto en cada lado e sobre as laterais ábrense tribunas con balcóns sobre a nave central e o cruceiro que se cobren con bóvedas de aresta de cachotería de xisto. Sobre o amplo cruceiro elevase unha cúpula de 46 casetóns apoiada nun anel sobre trompas e coroada por unha lanterna octogonal, restaurada nesta intervención.

Fonte: COPE da Costa-Ribadeo

Culminamos traballos de rehabilitación en dous bens senlleiros do #CamiñodeSantiago

?No claustro da Catedral de Lugo, no Camiño Primitivo

? Na igrexa de San Salvador de Lourenzá, no do Norte

Un investimento de case 1M€ para conservar o patrimonio para as xeracións futuras pic.twitter.com/vKomXt9QUF

— Román Rodríguez (@RomanLalin) March 25, 2023