A Semana Santa 2023 na diocese de Mondoñedo-Ferrol

Contar nunha diocese modesta como a nosa coas dúas Semanas Santas declaradas de Interese Turístico Internacional é un feito que nos ten que facer sentir orgullosos do traballo de tantas confrarías, ordes relixiosas e comunidades parroquiais que coidaron e puxeron en valor ao longo tantos anos a expresión da fe nos seus espazos de orixe e vida.

Litúrxicamente, achegámonos a datas intensas e os pasio-sacramentales e procesións destes días ábrennos a un gran encontro co noso patrimonio artístico e relixioso diocesano.

Podemos dicir que a chegada das ordes mendicantes á nosa diocese, de franciscanos e dominicos, sucedeu practicamente en vida dos seus propios fundadores. Debemos a eles unha riquísima expresión catequética que foi a orixe de moitos dos actos nos que imos participar. O nacemento de terceiras ordes levou á incorporación de seglares abrindo a súa espiritualidade á práctica e compromiso de moitas xeracións cristiás. Co tempo, superadas moitas circunstancias e dificultades propias de cada momento histórico, as tradicións e a imaxinería seguiron sendo camiño de comunicación e parte de todo un proceso de evanxelización arrincado en tempo ancestral.

Valorar e estimar ese legado forma parte da nosa actual responsabilidade. Continualo na actualidade require a nosa capacidade especial para saber lelo e adaptalo a unha evangelización cuxo mensaxe segue sendo sempre a salvación en Cristo, que segue facéndose presente cotidianamente no mundo de hoxe.

A mediados do século XX, tanto en Ferrol como en Viveiro (tamén en moitas outras comunidades de Mondoñedo-Ferrol) existiu un enorme esforzo por crear irmandades e confrarías que desen maior realce aos actos das súas semanas maiores. Deuse un novo impulso ás antigas confrarías e creáronse novas, realizando impoñentes imaxinerías que atoparían moitas dificultades nos anos posteriores para atopar portadores. Xa a finais de século XX presenciamos os froitos dun moi bo traballo. Nacen as Xuntas de Confrarías, actualízanse estatutos, comezan momentos de formación confrade, intégrase e restaura patrimonio… A suma dos esforzos e o agarimo no empeño levaría a que se recoñeceron rexional, nacional e internacionalmente.

Temos que valorar moi especialmente o traballo realizado e que se realiza en comunidades como Mondoñedo, Ribadeo, Burela, Ferreira, Neda, Ortigueira… onde pequenas confrarías empéñanse en recuperar, conservar e poñer en valor o seu legado.

Ribadeo

A súa imaxinería procede especialmente do legado franciscano, que con moito acerto foise restaurando parte desa imaxinería herdada e posto en valor recuperando actos como o Desencravo, ou realzando procesións como a do Santo Enterro. Colabora a Banda Sinfónica Municipal de Ribadeo, o Coro Miserere, o Coro Parroquial, a Coral Polifónica e o grupo de Tambores. Organiza a Confraría da Semana Santa xunto á Venerable Orde Terceira.

O pregoeiro deste ano será o bispo de Lugo, monseñor Alfonso Carrasco Rouco e terá lugar o sábado 1 de abril ás 20:30 horas.

É moi característica de Ribadeo a chamada “Procesión do Anxo”, dentro do encontro de Resurrección, ás 11:00 horas do Domingo de Pascua.

Descarga: Cartel oficial 2023 (PDF)
Descarga: Procesionario e relación de actos litúrxicos 2023 (PDF)

Mondoñedo

En Mondoñedo contamos con procesións e tradicións anteriores ao século XVI. Unido á antigüidade da imaxinería, algunha dela articulada como a do Encontro do Venres Santo, Mondoñedo conta cun espazo escénico medieval incomparable, xunto a nosa querida catedral da Asunción, onde non pode faltar entoar o “Plorans” (do mestre Pacheco), que só se pode cantar en Mondoñedo e na Capela Real de Madrid.

O pregón da Semana Santa deste ano correrá a cargo do bispo diocesano, monseñor Fernando García Cadiñanos, o sábado 1 de abril ás 20:30 horas na catedral.

Descarga: Cartel oficial 2023 (PDF)
Descarga: Historia, procesionario e relación de actos litúrxicos 2023 (PDF)

Ferreira do Valadouro

En Ferreira de Valadouro a Semana Santa caracterízase polas representacións que realizan os veciños e que unen á comunidade para participar intensamente nos actos da Paixón nestas datas.

Neda

En Neda celebrouse a novena do Cristo das Cadeas e o septenario da Virxe das Dores, e o vindeiro domingo de Ramos cóntase coa colaboración do concello para a organización da procesión de Ramos, que estará acompañada pola Agrupación ACOTAGA de Ferrol. O coro parroquial colabora sempre nas celebracións destes días.

Burela

Quizá a máis nova das semanas maiores da nosa diocese sexa a de Burela. Foi a súa alma mater o falecido sacerdote diocesano Ramón Marful Rodríguez, que fai xa máis de vinte e cinco anos apoiou con todo o seu empeño a quen se uniu para abrir camiño. Conta co respaldo da confraría “Santísimo Cristo e María Santísima das Dores”.

A lectura do pregón tivo lugar o pasado xoves 23 de marzo a cargo de Cándido Otero López, delegado de Liturxia e Confrarías da nosa diocese.

Descarga: Cartel e procesionario 2023 (PDF)

Ortigueira

Ortigueira sitúase xeograficamente entre Viveiro e Ferrol, polo que adoita ser espazo no que escalan algúns dos visitantes a esta zona norte nestes días. Fai quince anos iniciaba os seus pasos a Confraría da Virxe das Dores e do Nazareno para apoiar a tarefa parroquial, na actualidade restauraron todas as imaxes relixiosas que procesionan, recuperando as articuladas. A imaxinería procede do convento dominico e foise recuperando as celebracións e sacramentales para as que foron talladas: desencravo, encontro do Venres Santo…

Tiveron como preámbulo á Semana Santa tres grandes concertos no seu templo parroquial: Agrupación ACOTAGA de Ferrol, David Bellas (e alumnos do Conservatorio de Viveiro interpretando pezas do cancioneiro relixioso de Galicia) e o Coro do Conservatorio de Viveiro.

Viveiro

Oito confrarías, quince procesións, corenta pasos (desde os séculos XV ao XXI), fan da Semana Santa de Viveiro a máis antiga de Galicia, declarada de Interese Turístico Internacional desde o 2013. Un inxente traballo realizado pola Xunta de Confrarías que con creatividade e esforzo souberon coordinar concertos, exposicións, procesos de restauración, posta en valor documental…, un pobo que se envorca totalmente cunha Semana Santa que vive e que considera parte da súa esencia.

O pregón deste ano corre a cargo do profesor Emilio Xosé Insua, e celebrarase no teatro Pastor Díaz o sábado 1 de abril ás 20:30 horas, pechando o acto a Coral Alborada de Viveiro.

Descarga: Cartel oficial 2023 (PDF)
Descarga: Procesionario 2023 (PDF)
Descarga: Libro “Pregón” (PDF)
Descarga: Programación cultural ADRAL 2023 (PDF)
www.semanasantaviveiro.com

Ferrol

Ferrol conta cunha Semana Santa con máis de 400 anos de historia. Para comprendela habemos de entender o seu contexto: os franciscanos da Graña, Santa Catalina, a Orde Terceira, a orde dos servitas, os momentos dun arsenal militar onde se construíron e repararon os barcos da Armada Invencible, o tempo da Ilustración… Son momentos onde os carpinteiros traballaron paralelamente para mascarones de proa de naves, retablos ou imaxinería… A todo iso sumámoslle a condición de intercambio con Cartaxena e os arsenais do sur, que traerán os sones e influencias da Semana Santa de Andalucía. Declarada de Interese Turístico Internacional, segue construíndose con creatividade co esforzo das súas cinco irmandades e os seus respectivos terzos. O 1 de decembro de 2018 abría as súas portas o Museo da Semana Santa de Ferrol, que ten como obxectivo facerse presente máis aló das datas da súa celebración. Nel pódense observar diferentes imaxes e outras pezas que participan nas procesións. Está instalado nos baixos da Costa de Mella.

O pasado sábado 25 de marzo tivo lugar o Pregón no teatro Jofre de Ferrol a cargo do escritor e xornalista Ramón Loureiro Calvo.

Descarga: Revista “Ecce Homo” 2023 (PDF)
Descarga: Procesionario 2023 – Versión web (PDF)
Descarga: Procesionario 2023 – Versión móbil (PDF)
www.semanasantaferrol.com

Axenda do bispo diocesano para a Semana Santa

Domingo de Ramos
Mondoñedo, 11:30 h. – Bendición de Ramos (Igrexa Nova) e procesión ata a catedral. A continuación, eucaristía e procesión.

Martes Santo
Mondoñedo, 11:00 h. – Misa Crismal na catedral.

Mércores Santo
Ferrol, 19:00 h. – Procesión do Cristo dos Navegantes.

Xoves Santo
Ferrol, 18:00 h. – Oficios na concatedral.
Ferrol, 19:30 h. – Procesión da Nosa Señora das Angustias.
Ferrol, 23:00 h. – Procesión da Nosa Señora de Dores.

Venres Santo
Viveiro, 10:00 h. – Procesión e Sermón das Sete Palabras.
Mondoñedo, 17:00 h. – Paixón do Señor: oficios e procesión.

Sábado Santo
Mondoñedo, 23:00 h.- Solemne Vixilia Pascual na catedral.

Domingo de Resurrección
Ferrol, 11:00 h. – Misa de Pascua na concatedral.
Ferrol, 12:30 h. – Felicitación pascual e procesión.

Luns de Pascua
Ferrol, 13:00 h. – Romaría da Nosa Señora do Nordés – Virxe de Chamorro. Eucaristía e procesión.