Decreto de modificación dos estatutos do Consello de Pastoral

Tendo en conta a realidade pastoral da Diocese e buscando unha maior eficacia, polo presente Decreto APROBAMOS, dacordo co canon 496 e concordantes do Código de Dereito Canónico vixente, a reforma dos artigos 9 e 15 dos vixentes Estatutos do Consello Pastoral Diocesano, que queda redactados así:

Artigo 9.

Os membros do CPD son natos, elixidos e de designación episcopal.

1. Membros natos: Serán membros natos en atención á tarefa pastoral que desempeñan: O Bispo, o Vigairo Xeral e os Vigairos Episcopais, os Arciprestes, o Presidente/a de a CONFER (ou un relixioso/a en quen delegue) e o Director/a de Cáritas.

2. Membros electos:
a) Catro membros das Delegacións Diocesanas de Pastoral.
b) Un representante dos movementos e asociacións de fieis.
c) Un representante das confrarías.
d) Dous laicos por arciprestado.

3. Membros de designación episcopal: O Bispo poderá designar seis (6) membros, co fin de garantir a representación de todos os ámbitos territoriais, sociais e profesionais da Diocese (can. 512, 2).

4. Persoas convidadas: Pódese convidar a outros membros para participar nas deliberacións do Consello cando o tema o requira, con voz pero sen voto.

Artigo 15.

A Permanente:

1.A Comisión Permanente, elixida polo Pleno, presidida polo Bispo como Presidente do Consello, está composta por un dos Vigairos, un Arcipreste, o Secretario e o moderador e tres membros do Pleno, ben laicos ou consagrados.

2. A Comisión Permanente reunirase unha vez por trimestre ou cando o Presidente a convoque con carácter extraordinario.

3. O Bispo é quen convoca e preside a Comisión Permanente. O Bispo poderá delegar no Vigairo a presidencia da permanente, nos casos que considere oportunos.

Dado en Mondoñedo, ao 26 de xullo de 2023

+ Fernando García Cadiñanos
Bispo de Mondonedo-Ferrol

Por mandato de S. Excia. Rvdma.
Félix Villares Mouteira
Chanceler-Secretario Xeral