Español
Galego
981 35 32 95
mcs@mondonedoferrol.org
No medio dunha realidade complexa e dolorosa na que acompañamos a quenes máis sofren, a quenes necesitan recuperar dereitos e restaurar as súas vidas, estamos chamados a comunicar esperanza desde o amor cristián que dá sentido á nosa misión, para que todas as persoas vexan que é a forza do amor a que todo o cambia e transforma.
Desde ese amor que é don de Deus para toda a humanidade, e co lema “TI TES MOITO QUE VER. SOMOS OPORTUNIDADE. SOMOS ESPERANZA”, celebramos este ano o Día da Caridade, Día do Corpus Christi, co propósito de interpelar e convidar a tomar parte na vida social que compartimos crentes e non crentes, para abrir a nosa mente e reenfocar a mirada, para ver xuntos esoutra realidade do mundo da que formamos parte: a de moitas persoas que non poden acceder aos mesmos dereitos, os que viven en desvantaxe por moitas razóns, os que viven na tristeza, a soidade e a pobreza.
Celebrar o día de Caridade é participar no banquete do Reino, comulgar cos valores de Xesús e o seu estilo de vida, facernos pan e viño con el para dar vida en abundancia, entregala por amor, e facernos próximos, irmáns e irmás próximas, especialmente, dos que máis sofren.
Queremos animar e espertar a solidariedade e a compaixón que vive en cada persoa para que nos impliquemos e nos comprometamos cun estilo de vida que transforme o noso modelo de convivencia e o faga máis xusto, solidario e fraterno.
Actos en Mondoñedo-Ferrol
Con motivo da Semana da Caridade, desde Cáritas Mondoñedo-Ferrol organizáronse diversos actos, que comezarán o martes 6 coa presentación da Memoria 2022 da entidade. Farase a través dunha rolda de prensa (10:30 h.) no Centro de Día “Gabriel Vázquez Seijas” de Ferrol, na que están previstas as intervencións do bispo Fernando García Cadiñanos e a secretaria xeral, Marta Pazo. Na xornada de tarde (19:00 h.) a proposta xirará ao redor dunha palestra-coloquio, centrada no “Papel das administracións públicas e as entidades do terceiro sector na transformación social”. O acto desenvolverase na sede ferrolá de Afundación, coa intervencións do consultor social Fernando Fantova Azcoaga, e de Pedro Fuentes, membro do equipo de estudos de Cáritas Española.
Pola súa banda, o mércores 7, será As Pontes a localidade que acollerá o acto central, cun café-concerto solidario, a partir das 18:00 horas no Liceo. Contará coa colaboración especial da rondalla “Vila das Pontes” e do Concello de Vilalba. Ademais do café e a sesión musical, haberá unha exposición de sobremesas do mundo, repartirase un agasallo solidario e desenvolveranse xogos para os máis pequenos.
Na xornada matinal do sábado 10, os concellos de Ferrol e Narón serán punto de partida da II Camiñada Solidaria Inclusiva a favor de Cáritas, con saídas ás 11:00 horas desde a igrexa de San Nicolás de Neda e da Praza de Armas de Ferrol, confluíndo os dous roteiros na Praza de Galicia de Narón.
E xa o domingo 11, solemnidade do Corpus Christi-Día da Caridade, o bispo diocesano, monseñor Fernando García Cadiñanos, presidirá en Mondoñedo (catedral, 11:00 h.) e Ferrol (concatedral, 18:00 h.) a eucaristía e procesión solemne, que discorrerá polas principais rúas de ambas cidades.
DESCARGA: Mensaxe dos bispos na Festividade do Corpus Christi-Día da Caridade