Encontro pascual en Burela da CONFER de Mondoñedo-Ferrol

O pasado 17 de maio, aproveitando a xornada festiva en Galicia, celebrouse na Casa das Fillas do Divino Celo–Rogacionistas en Burela un encontro de Pascua para as comunidades de vida consagrada da nosa diocese de Mondoñedo-Ferrol.

Afortunadamente, e aínda que as ocupacións e compromisos destes relixiosos e relixiosas son moitos, reuníronse en Burela dez comunidades chegadas de diferentes puntos das provincias de Lugo e A Coruña, que conforman o territorio diocesano. Deste xeito, estiveron representadas nesta xornada de convivencia as seguintes comunidades: as Franciscanas da Purísima Concepción (Foz); as Irmás Apostólicas de Cristo Crucificado (tanto a comunidade do Barqueiro como tamén a de Guitiriz); os Irmáns das Escolas Cristiás–La Salle (Ferrol); as Fillas da Caridade de San Vicente de Paúl (as do Centro “San Pablo e San Lázaro” de Mondoñedo, así como as do Colexio do Sagrado Corazón de Ribadeo); as Fillas da Virxe das Dores (Ferreira do Valadouro); as Nais Mercedarias (Ferrol); os Misioneiros Claretianos (Ferrol); e, naturalmente, as anfitrioas no día de hoxe, as Fillas do Divino Celo–Rogacionistas.

Tras a acollida no Centro de Día de Menores “San Aníbal”, tivo lugar a celebración eucarística, que presidiron os claretianos P. Alberto (presidente de CONFER diocesana) e P. Ángel, e na que levou a cabo unha fermosa homilía compartida entre os participantes. Foi, desde logo, un momento moi especial e de gran unión entre todos eles.

Acto seguido, e nas propias instalacións da Casa, gozouse fraternalmente do momento da comida, que sempre dá ocasión para poñerse ao día entre as diferentes congregacións e compartir os avatares do seu quefacer, como tamén as alegrías da súa vida en comunidade.

Xa pola tarde, os relixiosos desprazáronse ata o próximo municipio de Cervo, onde visitaron o declarado (1972) conxunto histórico-artístico de Sargadelos. O antigo complexo industrial de Sargadelos é hoxe unha gran zona verde dominada por un bosque e atravesada polos ríos Xunco e Rúa. Nela quedan as ruínas do que foi a antiga fundición e das vivendas dos operarios; os restos dos catro fornos de calcinación; unha presa sobre o río Xunco, á que se chega polo Paseo dos Namorados (unha pequena camiñada que realizaron os asistentes); a Casa da Administración, convertida no Museo Histórico de Sargadelos, e o Pazo de Ibáñez, construido en 1804 como residencia do marqués.

O percorrido cultural non terminou aí, xa que a continuación a comitiva trasladouse á basílica de San Martiño de Mondoñedo (no municipio de Foz). O templo está considerado como a catedral máis antiga de España, coa súa posible orixe prerrománico e foi catalogado, xa no ano 1931, como Ben de Interese Cultural. San Martiño foi sede episcopal ata que cedeu dita categoría á cidade de Mondoñedo. No ano 2007 concédeselle a San Martiño a categoría de basílica.

E así rematou esta proveitosa xornada de convivencia entre os relixiosos da nosa diocese que, desde San Martiño, puxeron rumbo xa ás súas localidades de orixe, á espera dunha nova ocasión para reunirse.

Fonte: Fillas do Divino Celo-Rogacionistas

Encuentro pascual CONFER Mondoñedo-Ferrol en Burela

Artículos relacionados

Síguenos

5,484FansMe gusta
4,606SeguidoresSeguir
1,230SuscriptoresSuscribirte

Últimas publicaciones

Etiquetas