Visita do bispo á sede da confraría da Soidade de Ferrol

Na tarde de onte martes, 7 de marzo, o noso bispo visitou a sede da confraría da Soidade de Ferrol. Coas súas raíces nas antigas confrarías da Orde Terceira, o nacemento da confraría da Nosa Señora da Soidade supuxo para a Semana Santa de Ferrol un indispensable respaldo ao que debemos memoria e agradecemento na actualidade.

Tal como nos contan Alfredo Martín García e Ana Martín García, no seu estudo histórico artístico “As Confrarías da Orde Terceira de Ferrol” (Editado polas Confrarías da Orde Terceira de Ferrol en 2007), co respaldo da Armada e a precedente iniciativa da confraría de Dores, que fixera o esforzo por facer saír anteriormente á Virxe da Soidade, en 1957 arrinca a súa fundación e comeza as súas procesións en 1958. Recuperando así unha procesión que existía, polo menos, cen anos antes.

Fronte a confrarías doutros enclaves da nosa diocese, en Ferrol as confrarías adoptan algo moi característico e propio de confrarías do sur (especialmente Cartaxena, mundo militar…), coas que mantiveron vinculación polo intercambio entre os arsenais. Por este motivo, a constituída “Confraría e Irmandade da nosa Señora da Soidade”, irá creando os diferentes «terzos», como o de María Magdalena en 1959, o Ecce Homo en 1967 (como confraría e recuperando a súa antiga procesión da que existía constancia desde 1743), o terzo de San Pedro Apóstolo desde 1976, o do «Cristo da Luz e da Boa Morte» desde 1984…

Un longo traballo onde se foron incorporando novas imaxes, restaurado e poñendo en valor as antigas… son moitos os pasos, traballos e esforzos levados a cabo nestes anos. Desde o agarimo, a devoción e o empeño de moitos dos seus confrades e directivas.

En 1974 asinouse a acta de unión das confrarías do Ecce Homo e da Soidade, que a principios do presente século renovaron os seus estatutos á luz do Vaticano II, pasando a ter como título oficial o de “Confraría da Santísima Virxe da Soidade” e na súa forma abreviada “Confrarías da Soidade”.

Procesionan cinco dos días da nosa Semana Maior en Ferrol. O Domingo de Ramos, recuperando a primitiva procesión franciscana da serán con San Pedro que acompaña ao Ecce Homo. Ata o de agora, o Martes Santo, co Cristo da Boa Morte, que este ano se traslada ao Xoves Santo. O Mércores Santo acompañan á Virxe da Misericordia. O Venres Santo á nosa Señora da Soidade e á Madalena. E xa o Domingo de Resurrección á Madalena e o Resucitado.

É moi loable o esforzo e traballo que desde a confraría da Soidade realizouse durante e desde a pandemia a nivel de axuda social e caritativa. Unha función indispensable da confraría que serviu para unilos nunha preciosa causa e onde lles fixo crecer na súa conciencia e dimensión como fraternidade.

A súa sede canónica atópase na rúa Espartero 13, baixo, e podemos coñecer a súa imaxinería, vídeos, actividades de actualidade na súa web https://cofradiasoledadferrol.com

ÁLBUM DE FOTOGRAFÍAS